သာမဏေကျော်ဘွဲ့ရ အရှင်ဇောတိကာလင်္ကာရ အား ဂုဏပူဇာထုတိဂါထာ
+++++++++++
ရတ္တိံ စန္ဒော အလင်္ကာရော၊
အာဒိစ္စောဝ ဒိဝါ ယထာ ။
အလင်္ကာရဂုဏာ ဧဝံ ၊
ဂုဏဝန္တာ စ သဗ္ဗဒါ ။
စန္ဒော=မသာလျှင်ဆွေး, သာလျှင်အေးရ, ကမ္ဘာ့တန်ဆာ, လစန္ဒာသည်၊
ရတ္တိံ ဧဝ=ဆီနှင်း-မြူတိမ်,သူရိမ်-မီခိုး, ညစ်မျိုးကင်ပ, ညဥ့်အခါ၌သာ။
အလင်္ကာရော=အရောင်ထွန်းလင်း, တန်ဆာဆင်တတ်သည်၊
ဟောတိယထာ=ဖြစ်သကဲ့သို့လည်းကောင်း၊
အာဒိစ္စော=ရောင်ခြည်တစ်ထောင်, အလင်းဆောင်သည့် ရှင်နေမင်းသည်၊
ဒိဝါဝ=လူသူအများ ကိုယ့်စီပွားအတွက်, လှုပ်ရှားသွားလာ, နေ့အခါ၌သာ၊
အလင်္ကာရော=အရောင်ထွန်းလင်း, တန်ဆာဆင်တတ်သည်၊
ဟောတိယထာ=ဖြစ်သကဲ့သို့လည်းကောင်း၊
ဧဝံတထာ=နေ-လ-ပမာ, နှိုင်းယှဉ်ဖွယ်ရာ, ဤအတူသာလျှင်၊
အလင်္ကာရဂုဏာ=အလင်္ကာရ, သာမဏေကျော်, ဘွဲ့ထူး ရရှိကြကုန်သော။
အလင်္ကာရဂုဏာ=ဝိနည်းငါးကျမ်း,အင်္ဂုတ္တိုရ်(၁၁)ကျမ်း, ဓမ္မပဒ, ကျမ်းတော်များနှင့်, ဖွင့်လာ-ဋ္ဌကထာ, ဋီကာသရုပ်, သင်္ဂြိုဟ်-သဒ္ဒါ, ကျမ်းဖြာဖြာကို, ထေရ်ဆရာနည်းကျ, မလွဲရအောင်, ဖြေဆိုအောင်မြင်, အလင်္ကာရ, ဘွဲ့ထူးအရှင်, ဖြစ်တော်မူကြကုန်သော၊
ဂုဏဝန္တာစ=
သဒ္ဓါသတိ, ဝီရိယပညာ, နှိုင်းချိန်ကာဖြင့်, ကြိုးစားမပျက်, အားခွန်ဆက်သည့်, ( အရှင်ဇောတိကာလင်္ကာရဟု စသည်ကျော်ကြား) သာမဏေကျော် , အရှင်ဘုရားတို့သည်လည်း၊
သဗ္ဗဒါ=နေရောညပါ, အချိန်ရှိတိုင်း, ခပ်သိမ်းသော, ကာလတိုင်းမှာ၊
အလင်္ကာရာ=ပဋိဝေဒ, သာသနာထင်ပေါ်, အံ့ဖွယ်ရှစ်ဖြာ, သာသနာတော်ကို, ပရိယတ္တိတာဝန်, ပဋိပတ္တိတာဝန်တို့ဖြင့်,
ထွန်းလင်းတောင်ပအောင်, တန်ဆာ ဆင်နိုင်ကြပါ, ပေကုန်သည်တကား။
(အယံဂါထာနာမ ပထျာဝတ္တရစနသာမဏေရဂုဏထုတိဂါထာ၊
ဆန္ဒောနာမ အနုဋ္ဌုဘဆန္ဒော။)
ရေးသားပူဇော်သူ - တက္ကသိုလ်စာသင်သား
ရွတ်ဖက်ပူဇော်သူ -အရှင်နာယက(ဒီပဲရင်း)
(ဇာတိရောက်နေစဉ် သူငယ်ချင်း၏ တိုက်တွန်း
ခိုင်းစေချက်ဖြင့် နံနက်(၇)နာရီမှစတင်ရေးသားခဲ့ရာ
နံနက် (၉)ရီအချိန်တွင် အချောသက် ရေးသာပြီးဆုံးပါသည်၊
ပုလဲသွယ်ဂါထာ ရေးသားရန် စိတ်ကူးမိသော်လည်း
မှီခိုရာ ကျမ်းစာအုပ် မပါခဲ့သောကြောင့် ဆရာအရှင်မြတ်များ ပို့ချခဲ့သော နည်းစနစ်များကို စဉ်စား၍ ပထျာဝတ္တဂုဏပူဇာထုတိဂါထာမျှလောက်ကို
ရေးသားပူဇော်ပေးခြင်းဖြစ်ပါသည်အရှင်ဘုရား)
(၁၃ံ:၁၂:၁၃၇၈)
(25:3:2017)
တက္ကသိုလ်စာသင်သား
သာသနာ့တက္ကသိုလ်၊ မန္တလေး။
No comments:
Post a Comment