တက္ကသိုလ်စာသင်သား၏ ပထမဦးဆုံး လက်ရာလေးပါ
(ဥုဣန္ဒာစရိယမုတ္တာဝလိဝတ္တဂါထာ)
**********************
တရားနာပရိသတ်အပေါင်းကို, မေတ္တာပို့သလျက်,
ရတနာသုံးဖြာ, ထေရ်ဆရာတို့ကို, အာရုံပြုကာ,
သီကျူးဖွဲ့ဆိုအပ်သော, မေတ္တာအာသီသ ဝန္ဒနာပဏာမ,
မုတ္တာဝလိ(ပုလဲသွယ်)ဂါထာ
(ဖြင့် ရတနာသုံးဖြာ ထေရ်ဆရာတို့ကို ပူဇော်ရှိခိုးမှာ ဖြစ်သည့်အတွက် တရားချစ်ခင် စိတ်ကောင်း ဝင်ကြကုန်သော တရားနာပရိသတ်အပေါင်း သူတော်ကောင်းတို့မှာ လက်အုပ်အဉ္ဇလီ မနသိကာရ တုတ်ကွရိုကျိုးလျက် လက်အုပ်မိုးကာ ကြည်ညို ပူဇော်ကြပါကုန်စို့)
********
ဥုပဒ္ဒဝါ န သန္တာနံ ၊ ဣဒ္ဓိံ ဗုဒ္ဓဉ္စ သမ္ပတ္တိ-
န္ဒာယကံ ဓမ္မဒေသနံ ၊ စရံ ဘိက္ခုဂဏဉ္စာစ-
ရိယထေရံ နမာမဟံ ၊ ယသ္မာ သုခန္တု သန္တာနံ ။
သန္တာနံ-လောကလူရွာ,လူများစွာတို့, စားဝတ်နေရေး, ပျော်ပါးရေးနှင့်,လူမှုထွေထွေ,ပြုလုပ်နေကြ, ချိန်ကာလ၌၊ သာသနာအရေး ဒို့အရေး, သာသနာ့ကိစ္စ ဒို့ကိစ္စ, သာသနာ့တာဝန် ဒို့တာဝန်ဟု, သဒ္ဓါ စေတနာ ပြဌာန်းကာဖြင့်၊ ဗုဒ္ဓဆုံးမ မြတ်ဓမ္မကို,နာကြားလို၏ စိတ်ကရည်၍, စုပေါင်းရောက်လာ,တရားချစ်ခင်,စိတ်ကောင်းဝင်သည့်, တရားနာပရိသတ်အပေါင်း, သူတော်ကောင်းတို့အား။
ဥုပဒ္ဒဝါ(ဥပဒ္ဒဝါ)- ဘေးဥပ္ပါဒ်, အန္တရာယ်, ရန်သွယ်အပေါင်း, မကောင်းဟူသမျှတို့သည်။
န(ဟောန္တု)- မဖြစ်မပေါ်, မတွေ့မကြုံ, ကြပါ စေကုန်သတည်း။
ဣဒ္ဓိံ- လေးသချေၤကိန်း,ကပ်တစ်သိန်းက, ထိန်းသိမ်းစုဆောင်း, ပါရမီစွမ်းကြောင့်၊ ဘုန်းတော်ခြောက်စုံ, တန်းခိုးဂုဏ်နှင့်, ပြည့်စုံတော်မူထသော။
ဗုဒ္ဓဉ္စ-ဒုက္ခ သမုဒယ, နိရောဓနှင့်, မဂ္ဂမည်သာ, လေးသစ္စာကို, ဦးစွာပိုင်ပိုင်,သိမြင်နိုင်၍၊ ကျွတ်ထိုက်ဝေနေ,များဗိုလ်ချေကို, မိမိအတူ, သိစေတော်မူတတ်,ဂုဏ်သကတ်ကြောင့်၊ ဗုဒ္ဓမည်ငြား, မြတ်ဘုရားကိုလည်းကောင်း။
သမ္ပတ္တိန္ဒာယကံ- ကျင့်ကြံလိုက်နာ, ဝေနေယျအား, လူ့ရွာနတ်ထံ,နိဗ္ဗာန်အထိ, သမ္ပတ္တိကို, မိမိရရ, ပေးစွမ်းနိုင်ပေထသော။
ဓမ္မဒေသနံစ-မဂ်ဖိုလ်နိဗ္ဗာန်, ဓမ္မက္ခန်ဟု, ဆယ်တန်ထင်ပေါ်, တရားဒေသနာတော်မြတ်ကို လည်းကောင်း။
စရံ-ဗုဒ္ဓမြတ်စွာ,စိန္တေယျ၏, ဝိနည်းသုတ္တန်, အဘိဓမ္မံဟု, ဩဝါဒအဖြာဖြာ, ဒေသနာကို၊ သေခြာကျန, ကျင့်ကြံတော်, မူတတ်ထသော။
ဘိက္ခုဂဏဉ္စ-သုပ္ပဋိပန္န,အစဖြာသည့်, ကိုးဖြာဂုဏ်အင်, စုံပြည့်ညီသော, မဂ္ဂဋ္ဌာန်လေးပါး, ဖလဋ္ဌာန်လေးပါး, ရှစ်ပါးအရိယာ,မြတ်သံဃာနှင့်, ယခုရှိကြ,သမ္မုတိဟု, များစွာစုပေါင်း, ရဟန်းသံဃာတော်, အပေါင်းကိုလည်းကောင်း။
အာစရိယထေရံစ-အာ ဘုသော စရတီတိ အာစရိယော ၊ သာသနေ သီလာဒီဟိ ဂုဏေဟိ ထိရတီတိထေရော၊ အာစရိယော စ သော ထေရောစာတိ အာစရိယထေရောဟူသော ဝစနတ္ထနှင့်အညီ၊ ယုတ်လတ်ကယ်, မြတ်ပညာ, တတ်မျိုးစုံအောင်ပ, ဂုဏ်ရောင်မတိမ်မြုတ်စေနဲ့, အာထုတ်လိုက်ပါ၊ တန့်တည်ကြည်, မှတ်ထိမ်းလို့, ခပ်သိမ်းသည့်ပညာ, လျော်ကာမှ ဉာဏ်ယှဉ်သုံးဟု, မှတ်သားဖွယ်, ဆုံးမစကားတွေကို, ပြောဆိုကာ၊ လောကီစာပေ, လောကုတ္တရာစာပေနှင့်, လောကီရေးရာ, အတတ်ပညာ, များစွာတို့ကို, သွန်သင်ပြသ, ဆုံးမတော်မူတတ်သော, အာစရိယဂုဏ်၊ ထကြွနိုးကြား, သနားသိခံ, ဝေဖန်ထောက်ရှု, ဤခြောက်ခု, ကြီးသူကျင့်အပ်စွာ, ဟူသည်နှင်အညီ, အကြီးပဓာန, နာယကဂုဏ်၊ သီလ သမာဓိ ပညာ, ဝိမုတ္တိ ဝိမုတ္တိဉာဏဒဿန ဂုဏ်မြတ်တို့ဖြင့်, မြဲမြံခိုင်ခံသော, အနက်သဘောကြောင့်၊ အာစရိယထေရမည်ကျော်, ( ဧရာဝတီတိုင်းဒေသကြီး၊ မော်လမြိုင်ကျွန်းမြို့၊ မြို့မ-၉-ရပ်ကွက်၊ ပစ္ဆိမာရုံစာသင်တိုက်ကြီး၏ ဦးစီးပဓာန, နာယကဆရာတော်, ဘဒ္ဒန္တ စိန္တိတာလင်္ကာရ )ဟု နာမထင်ပေါ်, ထေရ်ဆရာတော်ကိုလည်းကောင်း။
အာစရိယထေရံစ- တပည့်ဒါယကာ,ဒါယိကာမတို့၏, အကျိုးစီးပွားကို, လိုလားတောင်းတ, ဂုဏ်ပေါင်းခသဖြင့်, တရားဓမ္မ, ဩဝါဒကို, မကြာမကြာ, မိန်းကြားတော်မူတတ်သော, (ဧရာဝတီတိုင်းဒေသကြီး၊ မော်လမြိုင်ကျွန်းမြို့နယ်၊ ကျွဲခြံချောင်းဖျားကျေးရွာ၊ ဓာတ်တော်စုကျောင်းတိုက်၌, နေညစံပျော်, သီတင်းသုံးနေထိုင်တော်မူသော, ဘဒ္ဒန္တမုနိန္ဒ)ဟု နာမမည်ခေါ်, ထေရ်ဆရာတော်ကိုလည်းကောင်း။
အဟံ- ရတနာသုံးဖြာ, ထေရ်ဆရာတို့, သွန်သင်ဆုံးမ, ဩဝါဒကို, ကြားရရွှင်ပျော်, ဘုရားတပည့်တော်သည်။
အဟံ- (ဘဒ္ဒန္တမုနိန္ဒ)ဟု နာမမည်ခေါ်, ထေရ်ဆရာတော်၏, ချီမြှောက်ထုတ်ဖော်, ကျေးဇူးတော်ကြောင့်၊ ဗုဒ္ဓဆုံးမ, မြတ်ဓမ္မကို, တဆင့်ပြန်လည်, ဟောပြောမည်ဟု, အားခဲကာ, တရားပလ္လင်ပေါ်သို့, တတ်လာသော, ရုပ်နာမ်နှစ်ဖြာ, ခန္ဓာငါးဝ, ဤကိုယ်ကာယကို, နာမပညတ်, အမည်မှတ်၍, (ဣန္ဒာစရိယ)မည်ခေါ်, ဘုရားတပည့်တော်သည်။
နမာမိ- လက်အုပ်အဉ္ဇလီ, နှုတ်သံချီ၍, ရွှင်ကြည်မနော, သုံးပါးသောဒွါရတို့ဖြင့်, ကန်တော့ရိုကျိုး, ရှိခိုးပူဇော်ပါ၏။
ယသ္မာ-အကြင်ကဲ့သို့, ရတနာသုံးဖြာ, ထေရ်ဆရာတို့ကို, ဦးစွာပဏာမ, ရှိခိုးပါရ, မြတ်ပုညကြောင့်။
သန္တာနံ- လောကလူရွာ,လူများစွာတို့, စားဝတ်နေရေး, ပျော်ပါးရေးနှင့်,လူမှုထွေထွေ, ပြုလုပ်နေကြ, ချိန်ကာလ၌၊ သာသနာအရေး ဒို့အရေး, သာသနာ့ကိစ္စ ဒို့ကိစ္စ, သာသနာ့တာဝန်, ဒို့တာဝန်ဟု, သဒ္ဓါ စေတနာ, ပြဌာန်းကာဖြင့်၊ ဗုဒ္ဓဆုံးမ, မြတ်ဓမ္မကို,နာကြားလို၏, စိတ်ကရည်၍, စုပေါင်းရောက်လာ,တရားချစ်ခင်, စိတ်ကောင်းဝင်သည့်, တရားနာပရိသတ်အပေါင်း, သူတော်ကောင်းတို့သည်။
သုခန္တု-ကိုယ်စိတ်နှစ်ဖြာ, လိုဣစ္ဆာတို့, ပြည့်ကာကြွယ်ဝ, အချမ်းသာကြီး, ချမ်းသာကြပါ, စေကုန်သတည်း။
သုခန္တု-ပစ္စုပ္ပန်,တမလွန်,နှစ်တန်ဘဝ, ချမ်းသာစေကြောင်း, တရားကောင်းကို, နာယူမှတ်သား, ကျင့်ကြံပွား၍, မဂ်ဖိုလ်နိဗ္ဗာန်, ချမ်းသာမှန်ဖြင့်, ကိုယ်စီကိုယ်ငှ, အချမ်းသာကြီး, ချမ်းသာကြပါ, စေကုန်သတည်း။
$$$$$$$$$$$$$$$$$$$$$
(သာမဏေကျော်တတိယဆင့် ဖြေဆိုပြီးနောက်
ရွှေညဝါသင်တန်နှင့် ရွှေဓမ္မာစရိယသင်တန်းတို့၏ အာဒိကမ္မိက, ရွှေသီလက္ခန်ကျမ်းပြု ဆရာတော် ဘဒ္ဒန္တသုန္ဒရာဘိဝံသ၏ ဂါထာစီနည်းကို အခြေခံ၍ ဓာတွတ္ထပန်းကုံးနှင့် ရတနာ့ဂုဏ်ရည် စာအုပ်တို့ကို အမှီပြုကာ နတ်တော်လဆန်း(၂)ရက်, (27-11-2011) တနင်္ဂနွေနေ့၌ ဤပုလဲသွယ်ဂါထာကို ရေးသားပြီးစီးခဲ့ပါသည်။)
@@@@@@@@@@@#####
မော်ကျွန်းမြို့နယ်ထဲက ပစ္ဆိမာရုံစာသင်တိုက်ထွက်
နောင်တော်တစ်ပါး သီတင်းသုံးတော်မူသော ကွမ်းခြံကုန်ကျေးရွာသို့
ရောက်ရှိစဉ် fbသုံးရင် postတင်ချင်တာနဲ့
သာမဏေကျော်စာသင်သားဘဝက ရေးသားခဲ့တဲ့
တရားမဟောခင် ရွတ်ဖတ်ပူဇော်မည့် ပုလဲသွယ်ဂါထာလေးကို အမှတ်တရအဖြစ် မှတ်စုစာအုပ်ကိုလှန်ကာ ရေးသားခဲ့တဲ့ ခုနှစ်နေရက်နှင့်
တကွ အမှတ်တရ ပြန်လည်ဖြန်ဝေလိုက်ပါတယ်
Tetkathol sarthinthar at 10:29 AM
Share
