မေးခွန်းမေး၍ လေ့လာနည်း နှင့် "ဘ" (၆) လုံး

မေးခွန်းမေး၍ လေ့လာနည်း နှင့် "ဘ" (၆) လုံး
===========================
မေးခွန်းများသည် အလွန်အရေးပါသည်၊ လေ့လာသူ၏ စိတ်ကို နှိုးဆွပေးတတ်သည်။ သိသည်ဟု ဝါကြွားနေသူကို အသံတိတ်သွားစေနိုင်သည်။ တချိန်တည်းမှာပင် " ငါကျွမ်းကျင်တယ်ထင်တဲ့ ဘာသာရပ်မှာတောင် ငါအကုန်မသိသေးပါလား?" ဟူသော အသိသတိသံဝေဂများရသွားစေနိုင်သည်။

ဂရိတွေးခေါ်ပညာရှင် ဆော့ခရတ္တိရဲ့ ပညာလေ့လာခြင်းနည်းစနစ်က မေးခွန်းမေးခြင်းပါပဲ။ သူက Question everything, ဘာဖြစ်ဖြစ် မေးပါတဲ့။
သူက လူငယ်တစ်ယောက်ကို ခေါ်ပြီး သူသင်ယူလေ့လာထားတဲ့ ပညာကို မေးတယ်။ မေးခွန်းတစ်ခုပြီးတစ်ခု စက်သေနတ်နဲ့ ပစ်သလို မေးတယ်။
နောက်ဆုံး အဲဒီလူငယ် ရင်ထဲအသိထဲမှာ-
" ငါ ဘာမှ ရေရေရာရာ မသိသေးပါလား" လို့
ဝန်ခံရအောင်အထိ မေးပစ်တာပါ။
ဒီအသိဟာ ထိုလူငယ်ကို ကြိမ်လုံးကိုင်စရာ၊ ခြောက်စရာ ငေါက်စရာ၊ စောင့်ကြည့်စရာ မလိုလောက်အောင် ပညာသင်ဆည်းပူးရာမှာ တွန်းအားဖြစ်စေပါတယ်။

ဆာ ရစ်ချာတ် စတုန်းက-
"ဘယ်ဆရာမှ တပည့်ကို
ပညာအကုန် တတ်အောင် သင်မပေးနိုင်ပါဘူး။
ပညာငတ်မွတ်လာအောင်
လုပ်ပေးနိုင်တဲ့ ဆရာဟာ
ဆရာကောင်းပါပဲ" တဲ့။
စတုန်းရဲ့ စကားအရ ဆော့ခရတ္တိဟာ ဒီလူငယ်ကို
"ပညာငတ်မှတ်သွားအောင် လုပ်ပေးလိုက်တာပါပဲ"။

မြတ်စွာဘုရားကို မေးခွန်းမေးလို့ အသိဉာဏ်ပညာပွင့်သွားတာတွေ အများကြီးရှိပါတယ်။ စူဠကမ္မဝိဘင်္ဂသုတ်မှာ သုဘလုလင်က မြတ်စွာဘုရားကို
"လောကမှာ တချို့လူတွေက ဉာဏ်ပညာရှိပြီး တချို့လူတွေက ထုံထိုင်းဖျင်းအနေကြပါတယ်။ ဘာကြောင့်ပါလဲ?"
လို့ မေးတော့-
မြတ်စွာဘုရားက -
" မေးမြန်းစုံစမ်း လေ့လာသူသည် ဉာဏ်ပညာကြီးမားပြီး၊
မမေးမမြန်း မစုံစမ်းမလေ့လာသူကတော့ ထုံထိုင်းဖျင်းအကြမည်ဖြစ်ကြောင်း" ဖြေတော်မူခဲ့ပါတယ်။
မဟာစည်ဆရာတော်က ဒါကို
"မမေး မမြန်း၊
ဉာဏ်မြင်ကန်း၊
စုံစမ်းဉာဏ်ကြီးမည်"
လို့ စပ်ဆိုခဲ့ပါတယ်။

စဉ်းစားကြည့်လေ တကယ်မှန်လေပါပဲ။
ဥပမာ လမ်းမသိရင် သိတဲ့သူကို မေးလိုက်ရင် ချက်ချင်းသိသွားတာပဲလေ။

မေးခွန်းမေးခြင်းရဲ့ အကျိုးတွေကိုပြောရရင်
၁။ မေးခွန်းမမေးခင် စဉ်းစားရပါတယ်။ ဒါကကို အမြတ်ပါ။
၂။ မေးလိုက်ရင် (စာသင်ခန်းထဲမှာဆိုရင်) တခြားသူတွေပါ သိရ။ ကြားရ၊ ဗဟုသုတရပါမယ်။ အမြတ်တစ်ခုပါ။
၃။ ဆရာကလဲ တပည့်ဟာ ဒါကိုမသိပါလားဆိုပြီး သိသွား နားလည်သွားပါမယ်။ မဟုတ်ရင် ရတယ်သိတယ်ထင်ပြီး ရှေ့ဆက်သင်နေရင် များလေ ခက်လေ။ ရှုပ်လေဖြစ်ကုန်ပါမယ်။
၄။ တခါတလေ တပည့်ရဲ့ မေးခွန်းဟာ ဆရာကို သူမသင်မိတာကို သတိရသွားစေပါမယ်။ သတိပေးသလိုဖြစ်သွားပါမယ်။
၅။ တခါတလေ ဆရာကို ပိုသိပိုကျွမ်းကျင်အောင်လေ့လာဖြစ်အောင် သတိပေးတွန်းအားပေးသလိုဖြစ်ပါတယ်။
၆။ တပည့်မေးခွန်းကြောင့် ဆရာက ဥပမာတွေ၊ သာဓကတွေ၊ ပုံပြင်တွေ၊ စဉ်းစားရ၊ ကြံဆရပါတယ်။ ဒါဟာ ဆရာအတွက်အမြတ်ပါ။
၇။ ဆရာက သာဓက စသည်တွေနဲ့ အဖြေမှန်ကို ပြန်ဖြေလိုက်ရင် တပည့်က တိတိကျကျသိရပြီး ပိုသိချင်စိတ်တွေ ဖြစ်လာပါမယ်။
စတဲ့ စတဲ့ အကျိုးတွေအများကြီးရှိပါတယ်။

မြန်မာနိုင်ငံပညာရေးမှာ အဲဒီအလေ့အထ မရှိသလောက်ရှားပါတယ်။
၁။ ဆရာက သင်ခန်းစာမကုန်မည်စိုး၍ မေးခွင့်မပြုတာလား?
၂။ ဆရာက မေးခွန်းမကြိုက်တာလား?
၃။ တပည့်ကလဲ ဆရာကခွင့်မပြုလို့ မမေးတာလား?
၄။ မမေးတတ်တာလား?
၅။ ဆရာကို လေးစားရိုသေကြောက်ရွံ့လို့လား?
၆။ တခြားအတန်းသားတွေ မကြိုက်မှာ အထင်သေးမှာ ကြောက်လို့လား?
စတဲ့ ပြဿနာတွေရှိမှာပါ။

အဓိကကတော့ ဆရာပါပဲ။
၁။ ဆရာက မေးခွင့်ပြုရင်၊ မေးခွန်းမေးဖို့ အားပေးထားရင်
၂။ မေးခွန်းမေးခြင်းရဲ့ အကျိုးရလာဒ်တွေကို ပြောပြထားရင်
မေးကြမှာပါ။

သင်ခန်းစာတွေက အများကြီးပါ။ အကုန်လုံး လိုက်ပြီး ဖတ်ဖို့၊ အနက်လှည့်လေ့လာဖို့ မလွယ်ကူပါဘူး။
ရှေးကဆရာတော်ကြီးတွေ တနှစ်ထဲ (၉) ကျမ်း စသည်အောင်မြင်ကျတာ အဲဒီ (၉) ကျမ်းရဲ့ ပါဠိ၊ အဋ္ဌကထာ၊ ဋီကာ အကုန် ပေါက်သည်ဟုမထင်။
ပင်ကိုယ်ဉာဏ်ကလည်း ထက်မြက်၊
ပါဌ်မြင်နက်ထင်ပြီး
စည်းမျဉ်းကျေညက်ကာ
သဘောပေါက်နားလည်အောင် လေ့လာခဲ့လို့ အောင်မြင်ခဲ့ကြသည်ဟု ထင်မြင်မိပါသည်။

မေးခွန်းမေး၍ လေ့လာနည်း
=================
မကျွမ်းကျင်ခင် ပါဠိဝါကျဖတ်ရာ၌
၁။  ပဓာနကြိယာကို အရင်ရှာ၊ အနက်ပေးပါ။
၂။ ၎င်းကြိယာကို ကတ္တားဟောကြိယာလား၊ ကံဟောကြိယာလား စိစစ်ပါ။
၃။ ကြိယာကို မေးခွန်းမေး၍ ကတ္တား၊ ကံ၊ ကရိုဏ်း စသောကာရကတို့ကို ရှာပါ။
၄။ ၎င်းကာရကတို့၏ ဝိဘတ်၊ လိင်၊ ဝုစ်တူပုဒ်များကို ရှာပါ။ သတိထားပါ။
၅။ အပဓာနကိတ်ကြိယာများကို ရှာ။ အနက်ပေးပါ။
၆။ ၎င်းတို့ကို ကတ္တားဟောလား။ ကံဟောလားစစ်ပါ။
၇။ ၎င်းကိတ်ကြိယာကို မေးခွန်းမေး၍ ကတ္တား၊ ကံ၊ ကရိုဏ်း စသောကာရကတို့ကို ရှာပါ။
(အပဓာနကိတ်ကြိယာပါမှသာလျှင် ၅၊ ၆၊ ၇ တို့ကို လိုအပ်မည်)

အရေးတကြီးလေ့ကျင့်ရန်
၁။ ကိတ်ကြိယာက ကတ္တားကိုဟောလျှင် ကတ္တားကိုလိုလျှင် ကတ္တားသည် ပထမာဝိဘတ်ရှိရမည်၊ ကတ္တားနှင့်ကြိယာ ဝိဘတ်၊ လိင်၊ ဝုစ် အနည်းအများ တူညီရမည်။ အာချာတ်ကြိယာဆိုလျှင် ဝုစ်သာတူမည်။
ကံသည် ဒုတိယာဝိဘတ်ဖြင့် ရှိရမည်။

အကျဉ်းမှတ်ရန်
ကတ္တား-ပထမာ + ကံ-ဒုတိယာ+ ကိတ်ကြိယာ-ကတ္တားဟော။

ပုံစံ
ဗုဒ္ဓေါ ဓမ္မံ ဒေသိတော။
သော သုခံ ပတ္တော။

၂။ ကိတ်ကြိယာက ကံကိုဟောလျှင် ကံကိုလိုလျှင် ကံမှာ ပထရမာဝိဘတ်ရှိ ရမည်။ ကံနှင့် ကိတ်ကြိယာ ဝိဘတ်၊ လိင်၊ ဝုစ်တူညီရမည်။ အာချာတ်ကြိယာဆိုလျှင် ဝုစ်သာတူမည်။
ကတ္တားမှာ တတိယာ/ ဆဋ္ဌီ တစ်ခုခုရှိရမည်။ တတိယာများသည်။

အကျဉ်းမှတ်ရန်
ကတ္တား-တတိယာ/ဆဋ္ဌီ+ ကံ-ပထမာ+ ကိတ်ကြိယာ-ကံဟော။

ပုံစံ
ဗုဒ္ဓေန ဓမ္မော ဒေသိတော။
အဘိဘဝိတဗ္ဗော ကောဓော ပဏ္ဍိတေန။ (ရူပသိဒ္ဓိ၊ ၃၃၈)

၃။ (က) အကမ္မကခေါ် ကံမရှိကိတ်ကြိယာက ကတ္တားကိုမလို ဘောခေါ်ပြုလုပ်ခြင်းမျှကို ဟောညွှန်းလျှင် ကတ္တားတတိယာ။ တခါတရံ ပကတိကတ္တား၊ ဝိကတိ (၂) ခုလုံး တတိယာ။ ဘောဟောကိတ်ကြိယာကား အမြံ နပုံလိင် ဧကဝုစ်ရှိရမည်။ အာချာတ်ဘောဟောကြိယာကား အသုံးမရှိ။ ဝိဂ္ဂဟပြုရာတွင်သာ သုံးကြသည်။

အကျဉ်းမှတ်ရန်
(ပကတိ)ကတ္တား-တတိယာ+ (ဝိကတိကတ္တား-တတိယာ)+ အကမ္မက ကိတ်ကြိယာ ဘောဟော၊ (နပုံလိင်)။

ပုံစံ
သမဏေန ဘဝိတဗ္ဗံ အဗျာဝဋေန။ (ပါရာဇိကပါဠိ၊ ၁၉၉)
ပဗ္ဗတေန ဝိယ အစလေန ဘဝိတဗ္ဗံ။ (မိလိန္ဒပဉှာ၊ ၃၆၉)
ဘဝိတဗ္ဗံ ဘဝတာ ပညေန။ (ရူပသိဒ္ဓိ၊ ၃၃၈)

၃။ (ခ) သကမ္မကခေါ် ကံရှိ ကိတ်ကြိယာက ကတ္တားကံကိုမလို ဘောဟောခေါ် ကြိယာမျှကိုသာ ဟောလျှင် လိုလျှင် ကတ္တားသည် တတိယာဝိဘတ်။ ကံသည် ဒုတိယာ/ဆဋ္ဌီ တစ်ခုခုရှိရမည်။ ဘောဟောကိတ်ကြိယာကား နပုံလိင် ဧကဝုစ်ဖြစ်ရမည်။
(ဘောဟောများ၌ ကတ္တား၊ ကံတို့သည် ဘောဟောကြိယာနှင့် ဝိဘတ်၊ လိင်၊ ဝုစ် တူဖွယ်မလို)

အကျဉ်းမှတ်ရန်
ကတ္တား-တတိယာ+ ကံ-ဒုတိယာ/ဆဋ္ဌီ + သကမ္မက ကိတ်ကြိယာ-ဘောဟော။

ပုံစံ
(မတွေ့ဖူးပါ၊ သတိမထားမိပါ)

ဥပမာ-
၃။ အထ ခေါ သမ္ဗဟုလာနံ ဘိက္ခူနံ ရတ္တိယာ ပစ္စူသသမယံ ပစ္စုဋ္ဌိတာနံ မဏ္ဍလမာဠေ သန္နိသိန္နာနံ သန္နိပတိတာနံ အယံ သင်္ခိယဓမ္မော ဥဒပါဒိ။
(သီလက္ခန္ဓ၊ ၂)

၁။ ဒီဝါကျမှာ အဓိကကြိယာသည် ဥဒပါဒိ၊အာချာတ်ကြိယာ၊အနက်က ဖြစ်ပေါ်ခဲ့ပြီ။
၂။  ဥပုဗ္ဗ+ ပဒဓာတ်+ အဇ္ဇတနီ ဤဝိဘတ်။ ကတ္တားဟော။
၃။ * ရဟန်းများစွာဖြစ်ခဲ့သလား?
ညဉ့်၏ မိုးသောက်ယံက ဖြစ်ခဲ့သလား?
ထိုင်ရာ ဇရပ် တန်ဆောင်းဝန်းကဖြစ်ခဲ့သလား?
စည်းဝေးထိုင်နေတဲ့ ရဟန်းတွေကဖြစ်ခဲ့တာလား?
ဘာဖြစ်တာလဲ? ဘယ်သူဖြစ်တာလဲ? မေးလိုက်ရင် ဤစကားပြောခြင်းသဘောသည်၊ စကားအသွားအလာသည် ဖြစ်ခဲ့ဟူသော အဓိပ္ပါယ်သာ ကောင်းသည်။
ထိုပုဒ်သည် ပထမာ၊ ဧကဝုစ်ဝိဘတ်ရှိပြီး ဥဒပါဒိကြိယာနှင့် ဝုစ်လည်းတူညီသည်။ ထို့ကြောင့် ၎င်း၏ ကတ္တားသည် အယံ သင်္ခိယဓမ္မော သာတည်း
ဥဒပါဒိသည် အကမ္မကကြိယာဖြစ်၍ ကံမလို။

* ဘယ်သူတွေရဲ့ စကားပြောခြင်းသဘော၊ စကားအသွားအလာလဲ?
မေးရင် များစွာသောရဟန်းတို့၏ စကားပြောခြင်းသဘော သာတည်း။
ထိုအရ ဘိက္ခူနံပုဒ်တို့သည် အယံ သင်္ခိယဓမ္မော၏ ဆဋ္ဌီတည်း။
တနည်း
ဘယ်သူတို့အား ထိုစကားပြောခြင်းသဘောဖြစ်ခဲ့သနည်း? မေးရင်
ထိုများစွာသောရဟန်းတို့အား ဤစကားပြောခြင်းသဘောဖြစ်ခဲ့ ဟု အနက်ရသည်။
ထိုအရ ဘိက္ခူနံသည် ဥဒပါဒိ၏ စတုတ္ထီအနေဖြင့်စပ်သည်။
အင်္ဂလိပ်၌ to somebodyနှင့်တူသည်။

၄။ ဘိက္ခူနံနှင့်ဝိဘတ်၊ လိင်၊ ဝုစ် တူသော ပုဒ်များကို ရှာလိုက်လျှင်
သမ္ဗဟုလာနံ၊ ပစ္စုဋ္ဌိတာနံ၊ သန္နိသိန္နာနံ၊ သန္နိပတိတာနံ တို့ကိုတွေ့ရသည်။
* ထိုပုဒ်တို့တွင် သမ္ဗဟုလာနံကို ရည်ရွယ်၍
ဘယ်လိုရဟန်းတွေလဲ။ ရဟန်းတွေက ဘယ်လောက်များလဲ?  မေးရင် များစွာကုန်သော ရဟန်းတို့ဟုရသည်။ ထိုအရ သမ္ဗဟုလာနံသည် ဘိက္ခူနံကို နာမဝိသေသနအနေနဲ့ စပ်သည် အထူးပြုသည်။ ထို့ကြောင့်ဝိဘတ်တူသည်။

၅။ ဤဝါကျ၌  ပစ္စုဋ္ဌိတာနံ၊ သန္နိသိန္နာနံ၊ သန္နိပတိတာနံ တို့ကား အပဓာန ကိတ်ပုဒ်။ ကြိယာပုဒ်တို့တည်း။
၆။ ၎င်းတို့သည် အားလုံး ကတ္တားဟော၊ ကတ္တုရုပ်ချည်းသာတည်း။
ပစ္စုဋ္ဌိတာနံကား ပတိပုဗ္ဗ+ ဥပုဗ္ဗ+ဌာဓာတ်+ တပစ္စည်း၊ ကတ္တုသာဓနကိတ်ပုဒ်။
သန္နိသိန္နာနံကား သံပုဗ္ဗ+ နိပုဗ္ဗ+ သိဓာတ်+ တပစ္စည်း၊ ကတ္တုသာဓနကိတ်ပုဒ်။
သန္နိပတိတာနံကား သံပုဗ္ဗ+ နိပုဗ္ဗ+ ပတဓာတ်+တပစ္စည်း၊ ကတ္တုသာဓနကိတ်ပုဒ်။

၇။ * ပစ္စုဋ္ဌိတာနံအရ အိပ်ရမှ ထကြတာ ဘယ်သူတွေလဲ? ကတ္တားကိုမေးရင်
ဘိက္ခူနံကို ရသည်။
* ဘယ်အချိန်ထတာလဲ? မေးရင် မိုးသောက်အခါ၊ ဘွေလီဘွေလင်း။ ထိုအရ ပစ္စူသသမယေသည် ပစ္စုဋ္ဌိတာနံနှင့် အဓိပ္ပါယ်ရှိသည်။ သတ္တမီပုဒ်။
* ဘာရဲ့ မိုးသောက်အခါလဲ? ဘာရဲ့ ဘွေလီဘွေလင်းလဲ? မေးရင် ညရဲ့ မိုးသောက်အခါဟု ရသည်။ ထိုအရ ရတ္တိယာကား ပစ္စူသသမယေ၏ ဆဋ္ဌီပုဒ်။

သန္နိသိန္နာနံ သန္နိပတိတာနံ တို့အရ ထိုင်ကြစုဝေးကြတာ
* ဘယ်သူတွေလဲ? ကတ္တားမေးရင် ဘိက္ခူနံ ရဟန်းတွေကိုရတယ်။
* ဘယ်မှာ ထိုင်ကြစုဝေးကြတာလဲ ? နေရာမေးရင် မဏ္ဍလမာဠေ ထိုင်ရာတန်ဆောင်းဝန်းရတယ်။ သူက သတ္တမီအနေနဲ့စပ်တယ်။

အားလုံးကိုခြုံပြီး ရသလို ဘာသာပြန်ကြည့်ရအောင်
၁။ ထိုအခါ၌ များစွာကုန်သော ရဟန်းတို့သည် ညမိုးသောက်အချိန် / မနက်မိုးလင်းစအချိန်၌ အိပ်ရာမှထပြီး ထိုင်ရာဇရပ်တန်ဆောင်းဝန်းမှာ ထိုင်ကြစုဝေးနေကြကုန်စဉ် ဤစကားပြောခြင်းသဘော၊ စကားအသွားအလာပေါ်ပေါက်လာခဲ့သည်။
(ဤ၌ ဘိက္ခူနံကို ဆဋ္ဌီအနာဒရဝန္တ သို့လက္ခဏဝန္တကတ္တား၊  ပစ္စုဋ္ဌိတာနံ၊ သန္နိသိန္နာနံ၊ သန္နိပတိတာနံ တို့ကို အနာဒရ သို့ လက္ခဏကြံသည်)

၂။ ထိုအခါ၌  ညမိုးသောက်အချိန် / မနက်မိုးလင်းစအချိန်၌ အိပ်ရာမှထပြီး ထိုင်ရာဇရပ်တန်ဆောင်းဝန်းမှာ ထိုင်ကြစုဝေးနေကြကုန်သော ထိုများစွာသောရဟန်းတို့အား ဤစကားပြောခြင်းသဘော၊ စကားအသွားအလာပေါ်ပေါက်လာခဲ့သည်။
(ဤ၌ ဘိက္ခူနံကို စတုတ္ထီကြံသည်။ ဥဒပါဒိ၌စပ်သည်)

၃။ ထိုအခါ၌  ညမိုးသောက်အချိန် / မနက်မိုးလင်းစအချိန်၌ အိပ်ရာမှထပြီး ထိုင်ရာဇရပ်တန်ဆောင်းဝန်းမှာ ထိုင်ကြစုဝေးနေကြကုန်သော ထိုများစွာသောရဟန်းတို့၏ ဤစကားပြောခြင်းသဘော၊ စကားအသွားအလာပေါ်ပေါက်လာခဲ့သည်။
(ဤ၌ ဘိက္ခူနံကို ဆဋ္ဌီကြံသည်။ အယံ သင်္ခိယဓမ္မော၌ စပ်သည်)

အချုပ်ပြောရရင်
သတင်းသမား။ သုတေသနသမားတို့ကဲ့သို့ "ဘ (၆) လုံးကို အမြဲသုံးပါဟု အကြံပြုရပါသည်။

"ဘ" (၆) လုံး
========
ဘယ်သူ
ဘာဖြစ်
ဘယ်နေရာ
ဘယ်အချိန်
ဘာကြောင့်
ဘယ်လို

တနည်း
အင်္ဂလိပ်က Wh မေးခွန်းစကားလုံးများရဲ့ အဓိပ္ပါယ်အတိုင်းမှတ်နိုင်သေးသည်။
၁။ who  ဘယ်သူက
၂။ whomဘယ်သူ့ကို
၃။ what ဘာဖြစ်၊ ဘာလုပ်
၄။ where ဘယ်နေရာမှာ
၅။ when ဘယ်အချိန်မှာ
၆။ why ဘာကြောင့်
၇။ whose ဘယ်သူ၏
၈။ which ဘယ်အရာ
၉။ how  ဘယ်လို

တနည်း
နာမ်ဝိဘတ် (၇) မျိုးအတိုင်းလည်း မေးနိုင်ပါသည်။ ဤကဲ့သို့ မေးခွန်းများမေး၍ အနက်အဓိပ္ပါယ်ကြံဆကြပါလေ။
၁။ ဘယ်သူက။ ဘာက (ပထမာ)
၂။ ဘယ်သူ့ကို။ ဘာကို (ဒုတိယာ)
၃။ ဘယ်သူနှင့်၊ ဘာဖြင့် (တတိယာ)
၄။ ဘယ်သူ့အား။ ဘယ်သူ့အတွက် (စတုတ္ထီ)
၅။ ဘယ်သူမှ၊ ဘာမှ။ ဘယ်နေရာမှ (ပဉ္စမီ)
၆။ ဘယ်သူ၏။ ဘာ၏ (ဆဋ္ဌီ)
၇။ ဘယ်သူ၌။ ဘယ်၌၊ ဘယ်နေရာ၌ (သတ္တမီ)
===============

ပါဠိလေ့လာသူ ညီငယ်၊ ညီမငယ်အားလုံး
အောင်မြင်မှုများ ရရှိပြီး ပြည်တွင်းပြည်ပသာသနာပြုနိုင်ကြပါစေ။

ဤကောင်းမှုကြောင့်
ဤဘဝ ကိလေသာမကုန်သေးသော်
ဖြစ်လေရာဘဝတိုင်း
ဉာဏ်ပညာထက်မြတ်သော တိဟိတ်သူတော်စင်ပုဂ္ဂိုလ်ဖြစ်ရပါလို၏။